0:00
/
1ܗ̇ܝܓܵܗ ܐ݇ܬܹܐܠܗܘܿܢ ܠܟܸܣ ܝܼܫܘܿܥ ܦܪ̈ܝܼܫܹܐ ܘܣܵܦܪܹ̈ܐ: ܕܡ̣ܢ ܐܘܿܪܸܫܠܸܡ: ܘܐܵܡܪܝܼ: 2ܩܵܡܘܿܕܝܼ ܬܲܠܡܝܼܕܘܼ̈ܟ ܒܸܥܒ̣ܵܪܵܐ ܝܢܵܐ ܥܲܠ ܣܵܦܝܵܢܘܼܬܵܐ ܕܚܘܵܪ̈ܕܸܩܢܹܐ: ܣܵܒܵܒ ܠܹܐ ܝܢܵܐ ܚܲܠܘܼܠܹܐ ܐܝܼܕܵܬܵܝ̈ܗܝ ܟܲܕ ܐܵܟ̣ܠܝܼ ܠܲܚܡܵܐ. 3ܘܓ̰ܘܼܘܸܒܠܹܗ ܘܐَܡܝܼܪܹܗ ܐܸܠܵܝܗܝ: ܩܵܡܘܿܕܝܼ ܐܘܼܦ ܐܲܚܬܘܿܢ ܒܸܥܒ̣ܵܪܵܐ ܝܬܘܿܢ ܥܲܠ ܦܘܼܩܕܵܢܵܐ ܕܐܲܠܵܗܵܐ ܒܘܼܬ ܣܵܦܝܵܢܘܼܬܵܘܟ̣ܘܿܢ. 4ܣܵܒܵܒ ܐܲܠܵܗܵܐ ܐَܡܝܼܪܹܗ: ܥܒ̣ܘܿܕ ܐܝܼܩܵܪܐ ܠܒܵܒܘܼܟ ܘܠܝܸܡܘܼܟ: ܘܡ̇ܢ ܕܨܵܥܸܪ ܠܒܵܒܹܗ ܘܠܝܸܡܹܗ ܡܝܵܬܵܐ ܡܵܝܸܬ. 5ܐܝܼܢܵܐ ܐܲܚܬܘܿܢ ܒܹܐܡܵܪܵܐ ܝܬܘܿܢ: ܟܠ ܡ̇ܢ ܕܐܵܡܸܪ ܠܒܵܒܵܐ ܝܲܢ ܠܝܸܡܵܐ: ܢܸܕܪܵܐ (ܝܠܹܗ) ܡܸܢܕܝܼ ܕܗܵܘܹܐ ܦܲܝܕܵܐ ܐܸܠܘܼܟܼ ܡܸܢܝܼ: ܠܵܐ ܥܵܒܸܕ ܐܝܼܩܵܪܵܐ ܠܒܵܒܹܗ ܝܲܢ ܠܝܸܡܹܗ. 6ܘܒܘܼܛܸܠܵܘܟ̣ܘܿܢ ܠܗܹܡܸܙܡܵܢ ܕܐܲܠܵܗܵܐ ܣܵܒܵܒ ܕܣܵܦܝܵܢܘܼܬܵܘܟ̣ܘܿܢ. 7ܢܵܣܒܲܝ̈ ܒܐܲܦܹ̈ܐ: ܨܦܵܝܝܼ ܢܘܼܒܸܠܹܗ ܥܲܠܵܘܟ̣ܘܿܢ ܐܹܫܲܥܝܵܐ ܘܐَܡܝܼܪܹܗ. 8ܐܵܗܵܐ ܛܵܝܸܦܵܐ ܒܣܸܦܘܵܬܹܗ ܟܹܐ ܥܵܒܸܕ ܐܝܼܩܵܪܵܐ ܐܸܠܝܼ: ܐܝܼܢܵܐ ܠܸܒܹܗ ܪܵܒܵܐ ܪܸܚܩܵܐ ܝܠܹܗ ܡܸܢܝܼ. 9ܘܒܣܪܝܼܩܘܼܬܵܐ ܒܸܣܓ̣ܵܕܵܐ ܝܢܵܐ ܐܸܠܝܼ: ܟܲܕ ܡܵܠܘܿܦܹܐ ܝܢܵܐ ܝܘܼܠܦܵܢܹ̈ܐ ܕܦܘܼܩܕܵܢܹ̈ܐ ܕܒܢܲܝ̈ܢܵܫܵܐ. 10ܘܩܪܹܐܠܹܗ ܠܟܸܢܫܹ̈ܐ: ܘܐَܡܝܼܪܹܗ ܐܸܠܵܝܗܝ: ܫܡܸܥܡܘܿܢ ܘܦܲܪܡܹܡܘܿܢ. 11ܠܹܐ ܝܠܹܗ ܡܸܢܕܝܼ ܕܥܵܒܸܪ ܠܦܘܼܡܵܐ ܟܹܐ ܟ̰ܲܦܠܸܢ ܠܒܲܪܢܵܫܵܐ: ܐܸܠܵܐ ܡܸܢܕܝܼ ܕܦܵܠܸܛ ܡ̣ܢ ܦܘܼܡܵܐ: ܗ̇ܘ ܟܹܐ ܟ̰ܲܦܠܸܢ ܠܒܲܪܢܵܫܵܐ. 12ܗ̇ܝܓܵܗ ܐ݇ܬܹܐܠܗܘܿܢ ܠܟܸܣܠܹܗ ܬܲܠܡܝܼܕܘܼ̈ܗܝ ܘܐܵܡܪܝܼ ܐܸܠܹܗ: ܒܝܼܕܵܥܝܵܐ ܝܘܸܬ ܕܦܪ̈ܝܼܫܹܐ ܕܫܡܸܥܠܗَܘܿܢ ܐܵܗܵܐ ܗܹܡܸܙܡܵܢ ܦܸܫܠܗَܘܿܢ ܡܘܼܟܦܸܪܹܐ. 13ܐܝܼܢܵܐ ܗ̇ܘ ܓ̰ܘܼܘܸܒܠܹܗ ܘܐَܡܝܼܪܹܗ: ܟܠ ܢܨܝܼܒ̣ܬܵܐ ܐܲܝܢܝܼ ܕܠܵܐ ܢܨܝܼܒ̣ܵܠܹܗ ܒܵܒܝܼ ܕܒܫܡܲܝܵܐ: ܒܸܬ ܦܵܝܫܵܐ ܥܩܝܼܪܬܵܐ. 14ܫܒ̣ܘܿܩܘܿܢ ܠܗ݇ܘܿܢ: ܣܸܡܝܹ̈ܐ ܝ݇ܢܵܐ ܬܲܓܒܸܪ̈ܵܢܹܐ ܕܣܸܡܝܹ̈ܐ ܝܢܵܐ. ܐܝܼܢܵܐ ܐܸܢ ܣܸܡܝܵܐ ܠܣܸܡܝܵܐ ܬܲܓܒܸܪ: ܬܸܪ̈ܘܵܝܗܝ ܒܓܘܼܒܵܐ ܟܹܐ ܢܵܦܠܝܼ. 15ܓ̰ܘܼܘܸܒܠܹܗ ܟܹܐܦܵܐ ܘܐَܡܝܼܪܹܗ ܐܸܠܹܗ: ܦܵܫܸܩ ܠܲܢ ܐܵܗܵܐ ܡܵܣܵܠܵܐ. 16ܘܐَܡܝܼܪܹܗ ܐܸܠܵܝܗܝ: ܗܲܠ ܐܵܕܝܼܵܐ ܐܘܼܦ ܐܲܚܬܘܿܢ ܠܹܐ ܝܬܘܿܢ ܦܲܪܡܘܼܝܹܐ. 17ܠܹܐ ܝܬܘܿܢ ܒܝܼܕܵܥܝܵܐ ܕܡܸܢܕܝܼ ܕܥܵܒܼܸܪ ܠܦܘܼܡܵܐ ܠܟܹܪَܣܵܐ ܟܹܐ ܐܵܙܸܠ: 18ܘܒܕܵܟ̣ܵܝܬܵܐ ܟܹܐ ܦܵܐܹܫ ܪܘܼܦܝܵܐ ܠܒܲܕܲܪ. ܐܝܼܢܵܐ ܡܸܢܕܝܼ ܕܡ̣ܢ ܦܘܼܡܵܐ ܦܵܠܸܛ: ܡ̣ܢ ܠܸܒܵܐ ܟܹܐ ܦܵܠܸܛ: ܘܗ̇ܘ ܟܹܐ ܟ̰ܲܦܠܸܢ ܠܒܲܪܢܵܫܵܐ. 19ܣܵܒܵܒ ܕܡ̣ܢ ܠܸܒܵܐ ܟܹܐ ܦܵܠܛܝܼ ܚܘܼܫܵܒܹ̈ܐ ܒܝܼܫܹ̈ܐ: ܩܸܛܠܹ̈ܐ: ܩܲܗܒܘܼܝܵܬܵܐ: ܙܵܢܝܘܼܝܵܬܵܐ: ܓܹܢܵܒ̣ܘܼܝܵܬܵܐ: ܣܵܗܕܘܼܬܵܐ ܕܵܓܠܬܵܐ: ܓܘܼܕܵܦܹ̈ܐ. 20ܐܲܢܹܐ ܝܢܵܐ ܕܟܹܐ ܟ̰ܲܦܠܸܢܝܼ ܠܒܲܪܢܵܫܵܐ. ܐܝܼܢܵܐ ܠܹܐܟ̣ܵܠܵܐ ܒܐܝܼܕܵܬܹ̈ܐ ܠܵܐ ܚܘܼܠܸܠܹ̈ܐ: ܠܹܐ ܟ̰ܲܦܠܸܢܵܐ ܠܒܲܪܢܵܫܵܐ. 21ܘܦܠܸܛܠܹܗ ܡ̣ܢ ܬܵܡܵܐ ܝܼܫܘܿܥ: ܘܐَܬܹܐܠܹܗ ܠܬܸܚܘܼܒ̣ ܕܨܘܿܪ ܘܕܨܲܚܕܘܿܢ. 22ܘܗܵܐ: ܚܕܵܐ ܒܲܟ̣ܬܵܐ ܟܢܲܥܢܵܝܬܵܐ ܡ̣ܢ ܕܐܵܢܝܼ ܬܸܚܘܼܒܹ̈ܐ ܦܠܸܛܠܵܗ̇ ܡܲܩܘܼܘܚܹܐ ܘܒܹܐܡܵܪܵܐ: ܪܵܚܸܡ ܥܲܠܝܼ: ܡܵܪܝܼ: ܒܪܘܿܢܹܗ ܕܕܵܘܝܼܕ: ܒܪܵܬܝܼ ܣܸܪܝܵܐ ܦܝܵܫܵܐ ܝ݇ܠܵܗ̇ ܓ̰ܘܼܢܓ̰ܸܪܬܵܐ ܒܕܲܝܘܵܐ. 23ܐܝܼܢܵܐ ܗ̇ܘ ܠܵܐ ܡܘܼܕܸܪܹܐ ܓ̰ܘܼܘܵܒ ܐܸܠܵܗ̇ ܘܐ݇ܬܹܐܠܗܘܿܢ ܬܲܠܡܝܼܕܘܼ̈ܗܝ ܒܥܹܐܠܗܘܿܢ ܡܸܢܹܗ ܒܹܐܡܵܪܵܐ: ܫܵܕܸܪܵܗ̇: ܕܡܲܩܘܘܼܚܹܐ ܝ݇ܠܵܗ̇ ܒܵܬَܪܲܢ. 24ܐܝܼܢܵܐ ܗ̇ܘ ܓ̰ܘܼܘܸܒܠܹܗ ܘܐَܡܝܼܪܹܗ: ܠܵܐ ܦܸܫܠܝܼ ܫܘܼܕܸܪܵܐ ܐܸܠܵܐ ܠܟܸܣ ܥܸܪ̈ܒܹܐ ܬܠܝܼܩܹ̈ܐ ܡ̣ܢ ܒܹܝܬ ܝܼܣܪܵܝܹܠ. 25ܐܝܼܢܵܐ ܗ̇ܝ ܐَܬܹܐܠܵܗ̇ ܣܓܸܕܠܵܗ̇ ܐܸܠܹܗ: ܘܐَܡܝܼܪܹܗ: ܡܵܪܝܼ: ܗܲܝܸܪܝܼ. 26ܗ̇ܘ ܓ̰ܘܼܘܸܒܠܹܗ ܘܐَܡܝܼܪܹܗ܆ ܠܹܐ ܝ݇ܠܵܗ̇ ܨܦܵܝܝܼ ܠܸܫܩܵܠܵܐ ܠܲܚܡܵܐ ܕܒܢܘܿܢܹ̈ܐ ܘܠܸܕܪܵܝܵܐ ܠܟܲܠܒܹ̈ܐ. 27ܐܝܼܢܵܐ ܗ̇ܝ ܐَܡܝܼܪܵܗ̇: ܗܹܐ ܡܵܪܝܼ: ܐܝܼܢܵܐ ܐܘܼܦ ܟܲܠܒܹ̈ܐ ܟܹܐ ܐܵܟ̣ܠܝܼ ܡ̣ܢ ܦܸܪ̈ܬܘܼܚܹܐ ܕܢܵܦܠܝܼ ܡ̣ܢ ܨܘܼܦܪܵܐ ܕܡܵܪ̈ܵܘܵܬܵܝܗܝ. 28ܗ̇ܝܓܵܗ ܓ̰ܘܼܘܸܒܠܹܗ ܝܼܫܘܿܥ ܘܐَܡܝܼܪܹܗ ܐܸܠܵܗ̇: ܝܵܐ ܒܲܟ̣ܬܵܐ: ܓܘܼܪܬܵܐ ܝ݇ܠܵܗ̇ ܗܲܝܡܵܢܘܼܬܵܟ̣ܝ: ܗܵܘܹܐ ܠܵܟ̣ܝ ܐܲܝܟܼ ܕܒܵܣܡܵܐ ܠܵܟ̣ܝ: ܘܒܣܸܡܠܵܗ̇ ܒܪܵܬܘܼܗ̇ ܡܗ̇ܝ ܣܵܥܲܬ. 29ܘܫܘܼܢܹܐܠܹܗ ܡ̣ܢ ܬܵܡܵܐ ܝܼܫܘܼܥ: ܘܐَܬܹܐܠܹܗ ܥܲܠ ܓܹܒܵܐ ܕܝܵܡܵܐ ܕܓܠܝܼܠܵܐ: ܘܐ݇ܣܸܩܠܹܗ ܠܛܘܪܵܐ: ܘܝܬܸܒ̣ܠܹܗ ܬܵܡܵܐ. 30ܘܐ݇ܬܹܐܠܗܘܿܢ ܠܟܸܣܠܹܗ ܟܸܢܫܹ̈ܐ ܪܵܒܵܐ: ܕܐܝܼܬ ܗ݇ܘܵܘ ܥܲܡܵܝܗܝ ܫܸܠܹ̈ܐ: ܘܣܸܡܝܹ̈ܐ ܘܠܲܥ̈ܠܹܐ: ܘܣܲܩܲܬܹ̈ܐ: ܘܐ݇ܚܹܪ̈݇ܢܹܐ ܪܵܒܵܐ܆ ܘܕܸܪܝܵܝܠܗܘܿܢ ܠܟܸܣ ܐܲܩܠܵܬܹ̈ܐ ܕܝܼܫܘܼܥ: ܘܒܘܼܣܡܵܝܠܹܗ. 31ܕܵܐܟ̣ܝܼ ܕܥܵܓ̰ܒܝܼ ܗ݇ܘܵܘ ܐܵܢܝܼ ܟܸܢܫܹ̈ܐ: ܕܚܙܹܐܠܗܘܿܢ ܠܲܥܠܹ̈ܐ ܗܲܡܙܘܼܡܹܐ: ܘܣܲܩܲܬܹ̈ܐ ܦܝܵܫܵܐ ܒܘܼܣܡܹܐ: ܘܫܸܠܹ̈ܐ ܒܸܚܕܵܪܵܐ: ܘܣܸܡܝܹ̈ܐ ܒܸܚܙܵܝܵܐ: ܘܫܘܼܒܸܚܠܗܘܿܢ ܠܐܲܠܵܗܵܐ ܕܝܼܣܪܵܝܹܠ. 32ܐܝܼܢܵܐ ܝܼܫܘܿܥ ܩܪܹܐܠܹܗ ܠܬܲܠܡܝܼܕܘܼ̈ܗܝ ܘܐَܡܝܼܪܹܗ ܐܸܠܵܝܗܝ: ܐܵܢܵܐ ܪܵܚܘܿܡܹܐ ܝܘܸܢ ܠܐܵܗܵܐ ܟܸܢܫܵܐ: ܕܐܵܕܝܼܵܐ ܬܠܵܬَܐ ܝܵܘܡܵܢܹ̈ܐ ܥܘܼܪܩܸܠܗܘܿܢ ܠܟܸܣܠܝܼ: ܘܠܲܝܬ ܠܗ݇ܘܿܢ ܡܸܢܕܝܼ ܕܐܵܟ̣ܠܝܼ: ܘܕܫܵܕܪܸܢܘܿܢ ܟܲܕ ܨܝܼܡܹ̈ܐ ܠܹܐ ܝ݇ܠܵܗ̇ ܒܣܵܡܝܼ: ܠܵܐ ܗَܘܸܐ ܕܟܵܟ̰ܚܝܼ ܒܐܘܼܪܚܵܐ. 33ܐܵܡܪܝܼ ܐܸܠܹܗ ܬܲܠܡܝܼܕܘܼ̈ܗܝ: ܡܐܲܝܟܵܐ ܐܝܼܬ ܠܲܢ ܚܲܕَ ܗܵܕܵܐ ܠܲܚܡܵܐ ܓܵܘ ܒܲܪܝܼܵܐ: ܕܡܲܣܒ̣ܵܥܚ ܠܚܲܕَ ܗܲܕܟ̣ܵܐ ܟܸܢܫܵܐ. 34ܐܵܡܸܪ ܐܸܠܵܝܗܝ ܝܼܫܘܿܥ: ܟܡܵܐ ܠܲܚܡܹ̈ܐ ܐܝܼܬ ܠܵܘܟ̣ܘܿܢ: ܐܵܡܪܝܼ: ܫܲܒ̣ܥܵܐ: ܘܚܲܕَܟ̰ܵܐ ܢܘܼܢܹ̈ܐ ܕܲܝܩܹ̈ܐ. 35ܘܦܘܼܩܸܕܠܹܗ ܠܟܸܢܫܹ̈ܐ ܕܝܵܬܒ̣ܝܼ ܥܲܠ ܐܲܪܥܵܐ. 36ܘܫܩܸܠܹܗ ܠܐܵܢܝܼ ܫܲܒ̣ܥܵܐ ܠܲܚܡܹ̈ܐ ܘܠܢܘܼܢܹ̈ܐ: ܘܫܘܼܒܸܚܠܹܗ: ܘܩܸܨܠܹܗ: ܘܝܘܼܗَܒܼܸܠܹܗ ܠܬܲܠܡܝܼܕܘܼ̈ܗܝ: 37ܘܬܲܠܡܝܼܕܹ̈ܐ ܠܟܸܢܫܹ̈ܐ. ܘܐَܟܼܸܠܗܘܿܢ ܟܠܵܝܗܝ ܘܣܒܹܥܠܗܘܿܢ: ܘܫܩܸܠܗܘܿܢ ܙܝܼܘܼܕܹ̈ܐ ܕܩܸܛܥܵܛܹ̈ܐ ܫܲܒ̣ܥܵܐ ܣܵܠܹ̈ܐ ܡܸܠܝܹܐ. 38ܘܐܵܢܝ ܕܐَܟܼܸܠܗܘܿܢ ܐܲܪܒܥܵܐ ܐܲܠܦܹ̈ܐ ܐ݇ܢܵܫܹ̈ܐ ܗ݇ܘܵܘ: ܫܒ̣ܘܿܩ ܡ̣ܢ ܒܲܟ̣ܬܵܬܹ̈ܐ ܘܝܲܠܘܼܕܹ̈ܐ. 39ܘܟܲܕ ܫܘܼܕܸܪܹܗ ܠܟܸܢܫܹ̈ܐ: ܐ݇ܣܸܩܠܹܗ ܠܓܵܡܝܼ: ܘܐَܬܹܐܠܹܗ ܠܬܸܚܘܼܒ̣ ܕܡܲܓܹܕܘܿ.